સ્માર્ટ ફોન(Smart Phone) અને ઈન્ટરનેટ(Internet) આવ્યા પછી ઓનલાઈન છેતરપિંડીના કેસમાં સતત વધારો થઈ રહ્યો છે. ત્યારે આવા જ એક કેસમાં દરિયાપુર પોલીસે એક ભેદ ઉકેલી કાઢ્યો છે. એક યુવકને છોકરી બનીને ઓનલાઈન(Online) ફ્રેન્ડશીપ કરવાનું મોંઘુ પડી ગયું હતુ. આ યુવકે છોકરીના નામે ઓનલાઈન એકાઉન્ટ બનાવ્યું હતું. બાદમાં તે અન્ય છોકરીઓ સાથે મિત્રતા કેળવતો હતો. આખરે તેનો આ ભાંડો ફૂટી ગયો હતો. દરિયાપુર પોલીસે આ મામલે યુવકની ધરપકડ કરીને આગળની કાર્યવાહી હાથ ધરી છે.
દરિયાપુર પોલીસના જણાવ્યા મુજબ, તેઓેએ નવા વાડજમાં રહેતા 28 વર્ષીય હિતેષ સોનીની આ મામલે ધરપકડ કરી છે. આમ તો તે મૂળ રાજસ્થાનના બાડમેર જિલ્લાનો વતની છે. તેણે છોકરીના નામે ખોટુ સોશિયલ મીડિયા અકાઉન્ટ(Social Media Account) બનાવ્યું હતું. તેણે ઈન્સ્ટાગ્રામ(Instagram) પર એક નહીં પણ અનેક અકાઉન્ટ બનાવ્યા હતા. તેણે તેના પ્રોફાઈલ ફોટામાં પણ છોકરીનો ફોટો મુક્યો હતો. આ રીતે અન્ય યુવતીઓને ફ્રેન્ડ રિક્વેસ્ટ મોકલતો હતો. પછી સામેની યુવતી જ્યારે રિપ્લાય આપે તો તેની સાથે ચેટિંગ કરતો હતો. પણ તેનો આ ખેલ ઝાઝો દિવસ ચાલ્યો નહીં.
જો કોઈ યુવતી કે મહિલા તેના ફોટોગ્રાફ્સને લાઈક કરતી તો તે તેનો સ્ક્રીનશોટ લઈ લેતો. પછી આ સ્ક્રીનશોટનો ઉપયોગ તે તેના ડિસ્પ્લે પિક્ચર તરીકે કરતો હતો. તે સતત આ રીતે અન્ય યુવતીના ફોટાથી પોતાનો પ્રોફાઈલ ફોટો બદલતો રહેતો હતો. જ્યારે પોલીસે તેને ઝડપ્યો ત્યારે તેના મોબાઈલ ફોનમાંથી અંદાજે 400 જેટલા સ્ક્રીનશોટ તે છોકરીઓના હતા તે કબજે કર્યા હતા.
આરોપી હિતેષ સોનીનો ભાંડો ત્યારે ફૂટ્યો કે જ્યારે એક યુવતીએ આ મામલે પોલીસ ફરિયાદ નોંધાવી. પછી પોલીસે ઊંડી તપાસ હાથ ધરીને આરોપીને ઝડપી પાડ્યો હતો. પોલીસ તપાસમાં સામે આવ્યું કે, તે વ્યાસવાડીના શિવમ એપાર્ટમેન્ટમાં રહે છે. મૂળ તો તે રાજસ્થાન(Rajasthan)નો છે અને તે શહેરના વિવિધ જ્વેલર્સ પાસેથી સોનાના દાગીના મેળવી તેના પર ડાયન્ડ બેસાડી આપવાનું કામ કરતો હતો.
તેને યુવતીઓ અને મહિલાઓ સાથે ફ્રેન્ડશીપ કરવી ગમતી હતી. એટલે તેણે આ રસ્તો અપનાવ્યો હતો. એટલે તેણે ઈન્સ્ટાગ્રામ અકાઉન્ટ પર નકલી અકાઉન્ટ બનાવ્યા અને પછી તે અન્ય યુવતીઓને ફ્રેન્ડશીપ રિક્વેસ્ટ મોકલતો હતો. દર ચારથી પાંચ દિવસે તે સામેની યુવતીના ફોટાને પોતાના પ્રોફાઈલ ફોટા તરીકે ઉપયોગ કરતો હતો. આખરે તેનો ભાંડો ફૂટી ગયો હતો. પોલીસે આ મામલે ગુનો નોંધીને આગળની કાર્યવાહી હાથ ધરી છે.