Dahod : ભજીયામાં ખામી નીકાળવી પતિને પડી ભારે ,જાણો વિગત

Aug 1, 2020

Dahod

દાહોદ (Dahod) તાલુકાના વડબારા ગામે ચકચારી બનાવ સામે આવ્યો છે
જેમાં પત્નિએ ભજીયા બનાવ્યા બાદ પતિ દ્વારા આ બનાવેલ ભજીયામાં ખામી કાઢતા બંન્ને પતિ – પત્નિ વચ્ચે ઉગ્ર બોલાચાલી બાદ ઝઘડો તકરાર થયો હતો.
આ બાદ રાત્રીના સમયે આ બદલાની આગમાં પત્નિ દ્વારા પતિ ઉપર હિંસક હુમલો કર્યો.
પતિના માથાના ભાગે, કાનની પાછળના ભાગે તથા આંખની નીચેના ભાગે દાંતરડા જેવા હથિયાર વડે તથા પથ્થર વડે માર મારતાં ઘટના સ્થળ પર જ મોત નીપજ્યું હતુ.
ઘટનાની જાણ વાયુવેગે પંથકમાં ફેલાતા આ બનાવથી પંથકમાં ખળભળાટ મચી જવા પામ્યો હતો.

દાહોદ (Dahod) ના વડબારા ગામે મિનામા ફ્ળિયામાં રહેતા 35 વર્ષીય ભાદુભાઈ જોગડાભાઈ મિનામા અને તેમની પત્નિ રમીલાબેન ભાદુભાઈ મિનામા ઘરમાં હતા.
ગતરોજ પત્નિ રમીલાબેને જમવાનું પણ બનાવ્યું હતુ અને જમવામાં ભજીયાની વાનગી પણ બનાવી હતી.
ભજીયા અંગે પતિ ભાદુભાઈએ કહેલ કે, તે ભજીયા કેવા બનાવેલ છે, તેમ કહેતા ઉપરોક્ત પતિ પત્નિ વચ્ચે આ મામલે ઉગ્ર બોલાચાલી પણ થઈ હતી
તથા આ ઝઘડાએ ઉગ્રરૂપ પણ ધારણ કર્યું હતુ.

આ બાદ પતિ સહિત પરીવારજનોના સમજાવટને પગલે મામલો તે સમયે થાળે તો પડયો હતો
પરંતુ આ ઝઘડાથી એકદમ ઉશ્કેરાયેલ પત્નિ રમીલાબેને વહેલી સવારના ૪ વાગ્યાના સમયે સુતેલ પોતાના પતિ ભાદુભાઈ ઉપર હિંસક હુમલો કર્યો.
પથ્થ તથા દાંતરડા જેવા હથિયારથી માથાના ભાગે, કાનના પાછળના ભાગે તથા આંખની નીચેના ભાગે ગંભીર ઈજાઓ પહોંચાડી મોતને ઘાટ ઉતારી દીધા.
તથા આ બનાવથી પરિવારજનોમાં સ્તબ્ધતા સહિત આક્રંદનો માહોલ છવાઈ ગયો હતો.

ઘટનાની જાણ ગ્રામજનો પણ થતાં લોકટોળા ઘટના સ્થળે ઉમટી પડયા હતા અને પોલીસ પણ આવી પહોંચી હતી.
આ સંબંધે મૃતક ભાદુભાઈના પિતા જોગડાભાઈ મગનભાઈ મિનામાએ પોતાની વહુ રમીલાબેન વિરૃધ્ધ કતવારા પોલીસ મથકે ફરિયાદ નોંધાવી.
ફરિયાદ નોંધાવતા પોલીસે ગુનો નોંધી તપાસ હાથ ઘરી છે.