બીભત્સ વિડીયો બનાવીને બદનામ કરવાના ડરથી છેતરપિંડી થતી હોવાના કેસમાં વધારો થઈ રહ્યો છે. આવો જ એક કિસ્સો દાંતીવાડા(Dantiwada) તાલુકાના એક ગામમાં નોંધાયો છે. જ્યાં નોકરી કરી રહેલા શિક્ષકનો બે શખસે બિભત્સ વિડીયો ઉતારીને તેમને બ્લેકમેલ કર્યા હતા અને તેમની પાસેથી 41 લાખ રૂપિયા પડાવ્યા હોવાની ઘટના સામે આવી છે. જેના કારણે પંથકમાં ચકચાર મચી ગઈ છે.
દાંતીવાડા તાલુકાના સિપુ વસાહતમાં રહેતા શિક્ષકને તેના જ ઘરમાં પાલનપુરના ઉમર ફિદાહુસૈન મુસલમાન તથા અકરમ ઈમ્તિયાઝ મુસલમાને કેફી પીણું પીવડાવ્યું હતું. જેના કારણે શિક્ષક બેભાન થઈ ગયા હતા અને બાદમાં બંને શખસોએ તેમનો બિભત્સ વિડીયો બનાવી દીધો હતો. બાદમાં તે વિડીયો વાઈરલ કરવાની તથા ખોટા મર્ડર કેસમાં ફસાવી દેવાની ધમકી આપીને બ્લેકમેલ કરવાનું શરૂ કર્યું હતું.
બંનેએ શિક્ષકને બ્લેકમેલ કરીને ધીમે ધીમે 41 લાખ રૂપિયા પડાવી લીધા હતા. અંતે શિક્ષકે દાંતીવાડા પોલીસમાં ફરિયાદ નોંધાવી હતી. પોલીસે બંને શખસોની ધરપકડ કરી છે અને આગળની કાર્યવાહી હાથ ધરી છે.
નોંધનીય છે કે બેમાંથી એક શખસે પોતાની રેડીમેડ કપડાની દુકાને આવેલા શિક્ષક જોડે મિત્રતા કરી લીધી હતી અને તેમનો મોબાઈલ નંબર પણ લીધો હતો. એકબીજાના પરિચયમાં તેઓ આવ્યા બાદ એક દિવસ તે સિપુ વસાહત ખાતે આવેલા શિક્ષકના ઘરે ગયા હતા. તે સમયે શિક્ષકના પત્ની અને બાળકો તેમના વતન ગયા હતા.
ત્યારે બંનેએ તેનો લાભ ઉઠાવીને શિક્ષકને કેફી પીણું પીવડાવી દીધું હતું. જેના કારણે તેઓ બેભાન થઈ ગયા હતા. બાદમાં તેમનો બીભત્સ વિડીયો ઉતાર્યો હતો અને તેને વાઈરલ કરવાની ધમકી આપીને 41 લાખ રૂપિયા પડાવી લીધા હતા.