સ્કૂલ બસે અડફેટે લેતા વિદ્યાર્થિનીનું મોત

A student died after being hit by a school bus in Jetpur

રાકેશ પીઠડીયા, જેતપુર : રાજકોટનાં જેતપુરમાં ગોઝારો અકસ્માત સર્જાયો છે. સ્કૂલ બસની અડફેટે બાળકીનું મૃત્યુ નીપજ્યું છે. ધોરાજીનાં ફરેણી ખાતે આવેલી સ્વામીનારાયણ સ્કૂલમાં ધોરણ-4માં અભ્યાસ કરતી બાળકીને તેની પોતાની સ્કૂલની બસ મુકવા આવી હતી. ત્યારે સ્કૂલ બસની અડફેટે આવી જતાં 9 વર્ષીય બાળકીનું ઘટનાસ્થળે જ મૃત્યુ નીપજ્યું હતું. આ હિચકારી ઘટનાના CCTV ફૂટેજ સોશિયલ મીડિયામાં વાઇરલ થઇ રહ્યા છે.

ફરેણી ખાતે આવેલી સ્વામીનારાયણ સ્કૂલમાં ધોરણ 4માં અભ્યાસ કરતી એક વિદ્યાર્થિની પોતાની સ્કૂલેથી પરત સ્કૂલ બસમાં ફરી રહી હતી. જે દરમિયાન બાળકીનું ઘર આવતા ડ્રાઈવરે સ્કૂલ બસ રોકી હતી અને તુરંત જ બાળકી બસમાંથી ઉતરી પોતાના ઘર તરફ ચાલતી થઈ હતી. જ્યારે બાળકી બસની આગળથી નીકળવા ગઈ ત્યાં જ બસના ડ્રાઈવરે આગળ પાછળ જોયા વગર બસ હંકારી મુક્તા બાળકી બસના ટાયર નીચે આવી જતા ઘટનાસ્થળે જ મૃત્યુ પામી હતી. આ સમગ્ર ઘટના સોસાયટીમાં લાગેલા CCTV કેમેરામાં કેદ થઈ હતી.

જેતપુરનાં મોટા ગુંદાળા ગામની વિદ્યાર્થીનીને અકસ્માત બાદ હોસ્પિટલ લઈ જવામાં આવી હતી. જ્યાં તેનું મોત નિપજતા અરેરાટી વ્યાપી જવા પામી હતી. ત્યારે સિવિલ સુપ્રિટેન્ડન્ટે વિદ્યાર્થીનીનું પી.એમ. કરવાની ના પાડતા મામલ બિચક્યો હતો. આ સમગ્ર બનાર અંગેની જાણ ભાજપનાં ધારાસભ્ય જયેશ રાદડિયાને થતા તેઓ તાત્કાલિક હોસ્પિટલ પહોંચ્યા હતા અને સિવિલ સુપ્રિટેન્ડન્ટને ખખડાવ્યા હતા. ત્યારે સિવિલનાં ર્ડાક્ટર દ્વારા ફોરેન્સિક પીએમ કરવાનું કહેતા ધારાસભ્યએ ર્ડાક્ટરનો પણ ઉધડો લીધો હતો.

સોસાયટીમાં લાગેલા CCTV કેમેરામાં અકસ્માતની ઘટના કેદ થઈ હતી. જેમાં સ્પષ્ટ જોઈ શકાય છે. કે, બાળકી સ્કૂલ બસમાંથી ઉતરી પોતાના ઘર તરફથી બસની આગળથી જવાનો પ્રયાસ કરે છે. ત્યાંજ બસ ડ્રાઈવરને બાળકી આગળથી નીકળે છે તેનો ખ્યાલ ન રહેતા બસ હંકારી મારતા પહેલા બાળકી પર બસના આગળના ટાયર ફરે છે. ત્યારબાદ પણ બસ ડ્રાઈવરને ખ્યાલ ન આવતા બસના પાછલાં ટાયર પણ બાળકી પર ફરી વળે છે. ત્યાર બાદ આગળ જઈ બસ ડ્રાઈવર બસને ઉભી રાખે છે, પરંતુ ત્યાં સુધીમાં બાળકી પર બેવાર વજનદાર ટાયર ફરી વળતા ઘટનાસ્થળ પર જ બાળકી દમ તોડી દે છે.