વડોદરા(Vadodara) શહેરમાં મકરપુરાની GIDCની કેન્ટોન લેબોરેટરીઝમાં આજે સવારે બોઇલર ફાટતા પ્રચંડ બ્લાસ્ટ થયો હતો. આ ગોઝારી દૂર્ઘટનામાં બોઇલરની નીચે દબાઇ જતા ચાર કામદારના મોત થયા છે. જ્યારે બાળકો સહિત 14 જેટલા કામદારો ઇજાગ્રસ્ત થયા હતા. કંપની પરિસરમાં જ કામદારોની વસાહત આવેલી છે અને વસાહતની નજીક જ બોઈલર ફાટવાની દૂર્ઘટના બની હતી. પ્રચંડ વિસ્ફોટથી પાસેના એકમોમાં પણ ધ્રુજારી આવી હતી. જોકે, હાલ આગ પર કાબુ મેળવી લેવામાં આવ્યો છે.
ઘટનાની જાણ થતાં જ ફાયર બ્રિગેડની ટીમ ઘટના સ્થળે દોડી ગઇ હતી અને આગ પર કાબૂ મેળવ્યો હતો. બોઇલર નીચે કામદારો દબાયેલા હોવાની આશંકાને પગલે ફાયરના કર્મીઓએ કાટમાળ હટાવવાની કામગીરી શરૂ કરી હતી.
વિસ્ફોટ એટલો પ્રચંડ હતો કે આસપાસના ઉદ્યોગો હચમચી ઉઠ્યા હતા. વિસ્ફોટ બાદ તરત એમ્બ્યુલન્સ નહીં આવતા ઇજાગ્રસ્ત બાળકો સહિત કામદારો જમીન પર પડી રહ્યા હતા.
